రాజస్థాన్‌లోని జైపూర్‌లో సీతాపూర్ ఇండస్ట్రియల్ ఏరియాలోని అచల్ జ్యువెల్స్ అనే జ్యువెలరీ కంపెనీలో 2025 మే 26 రాత్రి 8:30 గంటల సమయంలో ఘోర ప్రమాదం జరిగింది. సెప్టిక్ ట్యాంక్‌లో పేరుకుపోయిన బంగారం, వెండి కణాలను సేకరించేందుకు 10 అడుగుల లోతైన ట్యాంక్‌లోకి ఎనిమిది మంది కార్మికులను దింపారు. అయితే, విషపూరిత వాయువుల కారణంగా ఊపిరాడక నలుగురు కార్మికులు—అర్పిత్, రోహిత్, హిమాన్షు, సంజీవ్—మరణించారు. వీరంతా ఉత్తరప్రదేశ్‌కు చెందినవారు. మిగిలిన ఇద్దరు కార్మికులు తీవ్ర గాయాలతో మహాత్మా గాంధీ ఆసుపత్రిలో చికిత్స పొందుతున్నారు.
ఎలాంటి భద్రతా చర్యలు లేకుండా భూగర్భ సెప్టిక్ ట్యాంక్‌లోకి కార్మికులను పంపడంపై తాము దర్యాప్తు చేస్తున్నామని ఫోరెన్సిక్‌ నిపుణులు చెప్పారు. అందులో నిజంగానే బంగారు రజను ఉందా అనే విషయాన్ని పరిశీలిస్తున్నట్లు తెలిపారు. ఆభరణాల షాపు యజమాని, కాంట్రాక్టర్లపై చర్యలు తీసుకుంటామని అన్నారు. దీనిపై రాజస్థాన్‌ మాజీ ముఖ్యమంత్రి అశోక్ గెహ్లాట్‌ స్పందిస్తూ.. ఇలాంటి ఘటనలు రాష్ట్రంలో తరచూ సంభవిస్తున్నాయని విమర్శించారు. ఇలాంటి ఘటనలు పునరావృతం కాకుండా చర్యలు తీసుకోవాల్సిన అవసరం ఉందన్నారు. ఈ సంఘటనలో కంపెనీ యాజమాన్యం నిర్లక్ష్యం వల్ల ఈ ప్రమాదం జరిగినట్లు ఆరోపణలు వచ్చాయి. అధిక వేతనం ఆశ చూపి, తగిన రక్షణ పరికరాలు లేకుండా కార్మికులను ట్యాంక్‌లోకి దింపినట్లు తెలుస్తోంది. పోలీసులు కేసు నమోదు చేసి, దర్యాప్తు చేస్తున్నారు
