కాళేశ్వరం లిఫ్ట్ ఇరిగేషన్ ప్రాజెక్టుకు సంబంధించిన విచారణ కోసం బీఆర్ఎస్ అధినేత, మాజీ ముఖ్యమంత్రి కె. చంద్రశేఖర్ రావు (కేసీఆర్) జూన్ 11, 2025న జస్టిస్ పీసీ ఘోష్ నేతృత్వంలోని కాళేశ్వరం కమిషన్ ఎదుట హాజరయ్యారు. హైదరాబాద్‌లోని బూర్గుల రామకృష్ణారావు భవన్‌లో ఉదయం 11:30 గంటలకు ఈ విచారణ జరిగింది. కేసీఆర్‌తో పాటు మాజీ మంత్రి హరీష్ రావు, ఎంపీ వడ్డీరాజు రవిచంద్ర, ఎమ్మెల్యేలు ప్రశాంత్ రెడ్డి, పల్లా రాజేశ్వర్ రెడ్డి, పద్మారావు గౌడ్, బండారి శంతోష్ కూడా విచారణకు హాజరయ్యారు. ఈ విచారణకు బీఆర్ఎస్ శ్రేణులు భారీగా హాజరై, కేసీఆర్‌కు మద్దతు తెలిపారు.
కాళేశ్వరం ప్రాజెక్టులో అవినీతి, ఆర్థిక అక్రమాల ఆరోపణలపై 2024 మార్చిలో ఏర్పాటైన ఈ కమిషన్, మెడిగడ్డ, సుందిళ్ల, అన్నారం బ్యారేజీల నిర్మాణం, నిర్వహణలో లోపాలను విచారిస్తోంది. కేసీఆర్‌కు మే 20, 2025న కమిషన్ నోటీసులు జారీ చేసి, 15 రోజుల్లో హాజరు కావాలని ఆదేశించింది. అయితే, కేసీఆర్ జూన్ 5కి బదులుగా జూన్ 11న హాజరయ్యేందుకు సమయం కోరారు. బీఆర్ఎస్ నేతలు ఈ విచారణను రాజకీయ దురుద్దేశంతో కాంగ్రెస్ ప్రభుత్వం నడిపిస్తోందని ఆరోపిస్తున్నారు, కాళేశ్వరం ప్రాజెక్టును తెలంగాణ రైతులకు వరంగా అభివర్ణిస్తూ, దీనిని విఫలం చేసే కుట్రగా పేర్కొన్నారు.
