ఇరాన్ అణు కేంద్రాలపై ఇజ్రాయెల్‌తో కలిసి అమెరికా దాడులకు పాల్పడిందన్న వార్తల నేపథ్యంలో సోమవారం ఆసియా మార్కెట్లు భారీగా పతనమయ్యాయి. ముడి చమురు ధరలు ఒక్కసారిగా ఐదు నెలల గరిష్ఠ స్థాయికి చేరుకున్నాయి. టెహ్రాన్ తదుపరి చర్యలపై పెట్టుబడిదారులు తీవ్ర ఆందోళన వ్యక్తం చేస్తుండటంతో ప్రపంచ చమురు సరఫరాపై నీలినీడలు కమ్ముకున్నాయి. ఈ పరిణామాలు ప్రపంచ ఆర్థిక కార్యకలాపాలు, ద్రవ్యోల్బణంపై తీవ్ర ప్రభావం చూపే అవకాశం ఉందని విశ్లేషకులు భావిస్తున్నారు.
ఇవాళ్టి ట్రేడింగ్‌లో బ్రెంట్ క్రూడ్ ఆయిల్ ధర 2.7 శాతం పెరిగి బ్యారెల్‌కు 79.12 డాలర్లకు చేరగా, అమెరికా ముడి చమురు ధర 2.8 శాతం వృద్ధితో 75.98 డాలర్ల వద్ద స్థిరపడింది. ఇది జనవరి తర్వాత అత్యధిక స్థాయి కావడం గమనార్హం. అయితే, షేర్ మార్కెట్లు కొంతవరకు తట్టుకున్నప్పటికీ ఎస్&పి 500 ఫ్యూచర్స్ 0.5 శాతం, నాస్‌డాక్ ఫ్యూచర్స్ 0.6 శాతం మేర నష్టపోయాయి.
ఆసియా మార్కెట్లలో జపాన్ వెలుపల ఎంఎస్‌సీఐ ఆసియా-పసిఫిక్ షేర్ల సూచీ 0.5 శాతం క్షీణించగా, జపాన్ నిక్కీ సూచీ 0.9 శాతం మేర పతనమైంది. యూరప్‌లో యూరోస్టాక్స్ 50 ఫ్యూచర్స్ 0.7 శాతం, ఎఫ్‌టీఎస్ఈ ఫ్యూచర్స్ 0.5 శాతం, డాక్స్ ఫ్యూచర్స్ 0.7 శాతం మేర నష్టపోయాయి. ఇతర కమోడిటీ మార్కెట్లలో బంగారం ధర స్వల్పంగా 0.1 శాతం తగ్గి ఔన్స్‌కు 3,363 డాలర్ల వద్ద ట్రేడ్ అయింది. డాలర్ విలువ జపనీస్ యెన్‌తో పోలిస్తే 0.3 శాతం పెరిగి 146.48 యెన్‌లకు చేరగా, యూరో 0.3 శాతం తగ్గి 1.1481 డాలర్ల వద్ద ఉంది. డాలర్ ఇండెక్స్ 0.17 శాతం బలపడి 99.078 వద్ద నిలిచింది. ట్రెజరీల వైపు పెట్టుబడిదారులు పెద్దగా ఆసక్తి చూపలేదు.
ఇక, హోర్ముజ్ జలసంధిని మూసివేయడం ద్వారా ఇరాన్ అమెరికాపై ప్రతీకారం తీర్చుకోవచ్చనే భయాలు మార్కెట్ వర్గాల్లో నెలకొన్నాయి. ఈ జలసంధి అత్యంత ఇరుకైన ప్రదేశంలో కేవలం 33 కిలోమీటర్ల (21 మైళ్ళు) వెడల్పు మాత్రమే ఉంటుంది. ప్రపంచ చమురు వాణిజ్యంలో నాలుగో వంతు, ద్రవీకృత సహజ వాయువు (ఎల్‌ఎన్‌జీ) సరఫరాలో 20 శాతం ఈ జలసంధి గుండానే జరుగుతుంది. గతంలో కూడా టెహ్రాన్ ఈ జలసంధిని మూసివేస్తామని బెదిరించినప్పటికీ, ఆ చర్యలకు పాల్పడలేదు. అయితే, అమెరికా చర్యల తరువాత జలసంధిని మూసివేసేందుకు ఇరాన్ పార్లమెంట్ ఒక తీర్మానాన్ని ఆమోదించిందని ఇరాన్ ప్రెస్ టీవీ నివేదించింది.
