గర్భవతులు పారాసిటమాల్ వాడటం వల్ల పిల్లల్లో ఆటిజం లేదా ఏడీహెచ్డీ (ADHD) వచ్చే ముప్పు ఉందంటూ గతంలో అమెరికా మాజీ అధ్యక్షుడు డొనాల్డ్ ట్రంప్ చేసిన వ్యాఖ్యలు అవాస్తవమని తేలింది. ప్రతిష్టాత్మక ‘ది లాన్సెట్’ (The Lancet) జర్నల్లో శనివారం ప్రచురితమైన ఒక సమగ్ర అంతర్జాతీయ అధ్యయనం ఈ విషయాన్ని స్పష్టం చేసింది. ప్రపంచవ్యాప్తంగా ఉన్న గర్భిణీలకు ఈ వార్త పెద్ద ఊరటనిస్తోంది.
అసలు ఈ వివాదం ఎందుకు?
గతేడాది సెప్టెంబర్లో డొనాల్డ్ ట్రంప్, రాబర్ట్ ఎఫ్ కెన్నెడీ జూనియర్ కలిసి ఒక ప్రకటన చేస్తూ, గర్భిణీలు పారాసిటమాల్ వాడటం వల్ల పుట్టబోయే పిల్లల మెదడు ఎదుగుదలపై ప్రభావం పడుతుందని, ఇది ఆటిజంకు దారితీస్తుందని హెచ్చరించారు. దీంతో ప్రపంచవ్యాప్తంగా తల్లుల్లో తీవ్ర ఆందోళన మొదలైంది. అయితే, ఈ క్లెయిమ్లను పరిశీలించడానికి శాస్త్రవేత్తలు జరిపిన “గోల్డ్ స్టాండర్డ్” పరిశోధన ఇప్పుడు ఆ భయాలను పటాపంచలు చేసింది.
పరిశోధనలో ఏం తేలింది?
యూనివర్శిటీ ఆఫ్ లండన్ ప్రొఫెసర్ అస్మా ఖలీల్ నేతృత్వంలోని బృందం 43 విభిన్న అధ్యయనాలను నిశితంగా పరిశీలించింది. సుమారు 2,62,000 మంది పిల్లలపై జరిపిన ఈ మెటా-అనాలసిస్లో తేలిన ముఖ్యం అంశాలు ఇవే:
జన్యుపరమైన పోలిక: ఒకే తల్లికి పుట్టిన ఇద్దరు పిల్లల్లో (ఒకరి గర్భంలో ఉన్నప్పుడు తల్లి మందు వాడి, మరొకరి సమయంలో వాడకపోయినా) ఎదుగుదల తేడాలు లేవని గుర్తించారు.
వ్యాధే కారణం: గతంలో కొన్ని చిన్న అధ్యయనాల్లో ఆటిజం ముప్పు కనిపించడానికి కారణం మందు కాదు, ఆ సమయంలో తల్లికి ఉన్న జ్వరం లేదా ఇన్ఫెక్షన్ అని శాస్త్రవేత్తలు తేల్చారు.
ముప్పు లేదు: పారాసిటమాల్ వల్ల ఆటిజం, ఏడీహెచ్డీ లేదా మేధోపరమైన వైకల్యాలు వచ్చే అవకాశం ఏమాత్రం లేదని స్పష్టమైంది.
నొప్పిని భరించడం కంటే వాడటమే మేలు
ఒకవేళ గర్భిణీలు నొప్పి లేదా జ్వరంతో బాధపడుతూ మందులు వేసుకోకపోతే, అది గర్భస్రావానికి లేదా నెలలు నిండకుండానే ప్రసవం అయ్యే ప్రమాదానికి దారితీస్తుందని నిపుణులు హెచ్చరిస్తున్నారు. బ్రిటన్ ఎంహెచ్ఆర్ఏ (MHRA), ప్రపంచ ఆరోగ్య సంస్థ (WHO) వంటి పెద్ద సంస్థలు కూడా పారాసిటమాల్ను గర్భిణీలకు అత్యంత సురక్షితమైన మందుగా ధృవీకరించాయి.
రాజకీయ కారణాలతో వైద్య విషయాలపై తప్పుడు ప్రచారం చేయడం తగదని, వైద్యుల సలహా మేరకు పారాసిటమాల్ వాడటం వల్ల ఎటువంటి ఇబ్బంది ఉండదని ఈ అధ్యయనం తేల్చిచెప్పింది.
