అమెరికా అధ్యక్షుడు డొనాల్డ్ ట్రంప్ వలసదారులపై మరింత కఠిన ఆంక్షలను అమలు చేయాలని నిర్ణయించారు. ఇప్పటికే Green Card ధరఖాస్తుదారులకు పలు కఠిననియమాలు అమలులో ఉన్న నేపథ్యంలో, తాజాగా ట్రంప్ సర్కార్ సోషల్ మీడియా ప్రొఫైల్స్పై దృష్టి పెట్టింది.
Green Card, 1B Visa దరఖాస్తుదారులు తమ సోషల్ మీడియా హ్యాండిల్స్ను పౌరసత్వ, ఇమ్మిగ్రేషన్ సేవల (USCIS) అధికారులతో పంచుకోవాలి. ధరఖాస్తుదారుల గత పదేళ్ల సోషల్ మీడియా ప్రొఫైల్ చరిత్రను సమర్పించాల్సి ఉంటుంది. అమెరికాలో ఇప్పటికే ఉన్న గ్రీన్ కార్డుదారుల భవిష్యత్తు అనిశ్చితం. గ్రీన్ కార్డు కలిగి ఉన్నవారికి శాశ్వత నివాస హక్కు గ్యారంటీ కాదని ట్రంప్ సర్కార్ ప్రకటించింది. ఎప్పుడైనా వారి గ్రీన్ కార్డు హక్కును సమీక్షించి రద్దుచేయవచ్చని వెల్లడించింది.
మెరుగైన గుర్తింపు ధృవీకరణ, పరిశీలన, జాతీయ భద్రతా స్క్రీనింగ్ కోసం సోషల్ మీడియా ఖాతాల పరిశీలన అవసరమని అమెరికా ప్రభుత్వం చెబుతోంది. విదేశీ ఉగ్రవాదులు, ఇతర జాతీయ భద్రత, ప్రజా భద్రతా బెదిరింపుల నుండి అమెరికాను రక్షించడం అనే ట్రంప్ కార్యనిర్వాహక ఆదేశాన్ని పాటించడంలో భాగంగా ఇలా గ్రీన్ కార్డు దరఖాస్తుదారుల సోషల్ మీడియా ప్రొఫైల్స్ కోరుతున్నట్లు ప్రభుత్వ వర్గాలు తెలిపాయి.
అయితే ప్రజలు మాత్రం ఇది తమ వాక్ స్వాతంత్య్రంపై దాడిగా దీన్ని భావిస్తున్నట్లు తాజా సర్వే తెలిపింది. అమెరికాలో ఇప్పటికే ఉంటున్న గ్రీన్ కార్డుదారుల్ని ఏదో విధంగా టార్గెట్ చేస్తున్న ప్రభుత్వం, ఇప్పుడు కొత్తగా గ్రీన్ కార్డులు తీసుకునే వారు సైతం తమ సోషల్ మీడియా ప్రొఫైల్స్ ఇవ్వాల్సిందేనని ఆంక్షలు పెట్టడంపై విమర్శలు వ్యక్తమవుతున్నాయి. అయినా ట్రంప్ సర్కార్ ఇవేవీ పట్టించుకునేందుకు సిద్దంగా లేదు. ఇమ్మిగ్రేషన్ వర్గాలకు ఇచ్చిన అపరిమిత అధికారాల నేపథ్యంలో తమ సోషల్ మీడియా ప్రొఫైల్స్ దుర్వినియోగం అవుతాయన్న ఆందోళన కూడా వ్యక్తమవుతోంది.
