అమెరికా ఫస్ట్ అన్న నినాదంతో ముందుకు సాగుతోన్న ట్రంప్ సర్కార్ మరో కీలక నిర్ణయం తీసుకుంది. మోసపూరిత కార్యకలాపాలను అడ్డుకునేందుకు అమెరికా దౌత్య కార్యాలయం కీలక నిర్ణయం తీసుకుంది. ఇందులో భాగంగా భారత్లో 2,000 వీసా అపాయింట్మెంట్లను రద్దు చేసినట్లు బుధవారం వెల్లడించింది. అవి అక్రమ పద్ధతుల్లో, ప్రత్యేకంగా ‘బాట్స్’ ద్వారా బుక్ చేసినట్లు గుర్తించామని తెలిపింది. అపాయింట్మెంట్ షెడ్యూలింగ్ వ్యవస్థలో భారీ లోపం ఉన్నట్లు అధికారులు గుర్తించారు.
వీసా అపాయింట్మెంట్ల కోసం ధరఖాస్తుదారులు నెలల తరబడి ఎదురు చూస్తుండగా, కొన్ని ఏజెంట్లు ప్రత్యేకమైన సాఫ్ట్వేర్ టూల్స్ (బాట్స్) ఉపయోగించి స్లాట్లను ముందుగానే బుక్ చేసుకుంటున్నారు. చట్ట వ్యతిరేక విధానాన్ని అడ్డుకునేందుకు అమెరికా కాన్సులర్ బృందం ఈ చర్యలు తీసుకుంది.
తమ షెడ్యూలింగ్ విధానాలను ప్రభావితం చేసే ఏజెంట్లను, ఫిక్సర్లను ఏమాత్రం సహించమని అమెరికా దౌత్యకార్యాలయ అధికారులు చెబుతున్నారు. ఈ 2,000 అపాయింట్మెంట్లను రద్దు చేయడమే కాకుండా, వాటికి అనుబంధ ఖాతాలను కూడా సస్పెండ్ చేస్తున్నామన్నారు. వీసా దరఖాస్తు ప్రక్రియను పారదర్శకంగా ఉంచడానికి మోసపూరిత కార్యకలాపాలను నిర్మూలించేందుకు ప్రయత్నాలు కొనసాగిస్తామని ప్రకటించారు.
భారతదేశంలో అమెరికా బిజినెస్, విజిటర్ (B1, B2), స్టూడెంట్ వీసాలకు అపాయింట్మెంట్ పొందేందుకు సుదీర్ఘ Waiting Time ఉంటుంది. అయితే ఏజెంట్ల ద్వారా ప్రాసెస్ చేస్తే, రూ.30,000 నుంచి రూ.35,000 వరకు చెల్లించి నెల రోజుల్లోనే అపాయింట్మెంట్ పొందడం సాధ్యమవుతుంది. ఈ విధానంలో ఏజెంట్లు ప్రత్యేక బాట్స్ను ఉపయోగించి వీసా స్లాట్లను ముందుగానే బుక్ చేసుకుంటున్నారు. ఒక వ్యక్తి తన కుమారుడు అమెరికాలోని విశ్వవిద్యాలయంలో చేరేందుకు స్వయంగా వీసా అపాయింట్మెంట్ కోసం ప్రయత్నించగా అది సాధ్యం కాలేదని, అదే ఏజెంటుకు రూ.30,000 చెల్లించగానే వెంటనే అపాయింట్మెంట్ లభించిందని ఓ ప్రముఖ ఆంగ్ల వార్తా పత్రికకు వెల్లడించాడు.
2023లో B1, B2 వీసా అపాయింట్మెంట్లకు 999 రోజుల వేటింగ్ పీరియడ్ నమోదయ్యింది. దీంతో భారతీయ ధరఖాస్తుదారుల కోసం ఫ్రాంక్ఫర్ట్, బ్యాంకాక్ వంటి నగరాల్లో వీసా అపాయింట్మెంట్లు తెరవాల్సిన పరిస్థితి వచ్చింది. భారత ప్రభుత్వం ఈ సమస్యను అమెరికా దృష్టికి తీసుకెళ్లిన తర్వాత, అక్కడి అధికారులు వీసా వెయిటింగ్ సమయాన్ని గణనీయంగా తగ్గించారు. తాజా పరిణామంలో, బాట్స్ ద్వారా అక్రమంగా స్లాట్లను బుక్ చేసే మోసాలను అడ్డుకోవడంపై దృష్టిపెట్టినట్లు స్పష్టమైంది.
