జాతీయ దర్యాప్తు సంస్థ (ఎన్.ఐ.ఏ.) తాజాగా దక్షిణ భారత రాష్ట్రాలైన తమిళనాడు, కేరళ, ఆంధ్రప్రదేశ్, కర్ణాటకలలోని పలు దేవాలయాలపై ఐ.ఎస్.ఐ.ఎస్.తో సంబంధం ఉన్న ఉగ్రవాద సంస్థలు దాడులు చేసేందుకు కుట్ర పన్నుతున్నట్లు హెచ్చరిక జారీ చేసింది. 2022లో కోయంబత్తూర్‌లోని అరుల్మిగు కొట్టై సంగమేశ్వరర్ దేవాలయం వద్ద జరిగిన కారు బాంబు పేలుడు కేసు దర్యాప్తులో ఈ విషయం వెలుగులోకి వచ్చింది. ఈ కేసులో ఇప్పటివరకు 17 మంది ఉగ్రవాదులపై ఎన్.ఐ.ఏ. చార్జిషీట్ దాఖలు చేసింది, వీరిలో షేక్ హిదాయతుల్లా, ఉమర్ ఫారూక్, పవాస్ రహ్మాన్, షరన్ మారియప్పన్, అబూ హనీఫా ఉన్నారు.
ఈ ఉగ్రవాదులు 2021-2022లో నకిలీ కోవిడ్ టీకా సర్టిఫికెట్ల స్కామ్ ద్వారా నిధులు సేకరించి, ఆ నిధులను బాంబు తయారీకి, ఇతర ఉగ్రవాద కార్యకలాపాలకు ఉపయోగించినట్లు ఎన్.ఐ.ఏ. తెలిపింది. ఈ దాడులు కేవలం ఒక్క రాష్ట్రానికే పరిమితం కాకుండా, దక్షిణ భారతదేశంలోని ఇతర రాష్ట్రాల్లోని దేవాలయాలను కూడా లక్ష్యంగా చేసుకున్నట్లు దర్యాప్తులో తేలింది. ఈ కుట్రలో భాగంగా, వీరు సలఫీ-జిహాదీ భావజాలాన్ని అనుసరిస్తూ యువతను రెచ్చగొట్టి, ఉగ్రవాద కార్యకలాపాలకు ఆకర్షితుల్ని చేస్తున్నారు.
ఎన్.ఐ.ఏ. హోం మంత్రిత్వ శాఖ యొక్క కౌంటర్ టెర్రరిజం అండ్ కౌంటర్ రాడికలైజేషన్ విభాగం రాష్ట్ర సంస్థలతో సన్నిహితంగా సహకరిస్తూ, ఈ ఉగ్రవాద కుట్రను అడ్డుకునేందుకు అవసరమైన చర్యలు చేపడుతోంది.
