భారత క్రికెట్ జట్టు 2025 ఆసియా కప్ నుంచి తప్పుకుంటున్నట్లు బోర్డ్ ఆఫ్ కంట్రోల్ ఫర్ క్రికెట్ ఇన్ ఇండియా (BCCI) ఆసియా క్రికెట్ కౌన్సిల్ (ACC)కు సమాచారం ఇచ్చింది. ఈ నిర్ణయం భారత్-పాకిస్తాన్ మధ్య ఇటీవలి రాజకీయ ఉద్రిక్తతల నేపథ్యంలో వచ్చింది. ACC ప్రస్తుతం పాకిస్తాన్ ఇంటీరియర్ మినిస్టర్, పాకిస్తాన్ క్రికెట్ బోర్డ్ (PCB) ఛైర్మన్ మొహ్సిన్ నక్వీ నేతృత్వంలో ఉంది. ఇది BCCI నిర్ణయంలో కీలక పాత్ర పోషించింది.
BCCI వర్గాల ప్రకారం “పాకిస్తాన్ మంత్రి నేతృత్వంలోని ACC ఆధ్వర్యంలో జరిగే టోర్నమెంట్‌లో భారత జట్టు ఆడలేదు. ఇది దేశ భావన. మేము ACCకు మా నిర్ణయాన్ని తెలియజేశాము. మేం భవిష్యత్ లో పాల్గొనడం కూడా పరిశీలనలో ఉంది. మేము భారత ప్రభుత్వంతో నిరంతరం సంప్రదింపులు జరుపుతున్నాము.”
ఈ విధానం వల్ల సెప్టెంబర్‌లో జరగాల్సిన మెన్స్ ఆసియా కప్‌పై ప్రశ్నార్థకం ఏర్పడింది. దీనిని భారత్ హోస్ట్ చేయాల్సి ఉంది. భారత్ లేకుండా టోర్నమెంట్ ఆర్థికంగా, వాణిజ్యపరంగా ఆకర్షణీయంగా ఉండకపోవచ్చు, ఎందుకంటే భారత్-పాకిస్తాన్ మ్యాచ్‌లు ప్రధాన ఆకర్షణగా ఉంటాయి. భారత స్పాన్సర్లు టోర్నమెంట్ ఆదాయంలో సింహభాగం సమకూరుస్తారు. అంతేకాక, జూన్‌లో శ్రీలంకలో జరగాల్సిన విమెన్స్ ఎమర్జింగ్ టీమ్స్ ఆసియా కప్ నుంచి కూడా BCCI వైదొలిగింది.
ఈ నిర్ణయం పాకిస్తాన్ క్రికెట్ బోర్డ్‌కు ఆర్థికంగా తీవ్ర నష్టం కలిగించవచ్చని, సుమారు ₹165-220 కోట్ల ఆదాయ నష్టం జరిగే అవకాశం ఉన్నట్లు అంచనా వేయబడింది. గతంలో 2023లో ఆసియా కప్‌ను హైబ్రిడ్ మోడల్‌లో నిర్వహించారు, భారత్ తన మ్యాచ్‌లను శ్రీలంకలో ఆడింది. అయితే ఈసారి BCCI పూర్తిగా వైదొలగడం ఒక పెద్ద అడుగుగా భావిస్తున్నారు.
మొత్తంగా, ఈ నిర్ణయం ఆసియా క్రికెట్‌లో పెద్ద మార్పులకు దారితీయవచ్చు, బహుశా ACC విచ్ఛిన్నం కావచ్చని కూడా కొందరు నిపుణులు అభిప్రాయపడుతున్నారు, దీనిపై సునీల్ గవాస్కర్ వంటి దిగ్గజాలు కూడా తమ అభిప్రాయాలను వ్యక్తం చేసారు.
