చేతిలో ప్లేట్ పట్టుకొని అడుక్కుతినటానికి పోయినట్లు ఉంది అని ఒకరు, వడ్డించే వాడు రెండు సార్లు వెళితే ఒక విధంగా చూస్తున్నాడు అని, పెద్ద పెద్ద క్యూలు ఉంటున్నాయి అని, తిరిగి పెట్టించుకోవటానికి చాల ఇబ్బంది అవుతుంది అని, నిలబడి తినలేకపోతున్నాం అని ఇలా రక రకాల సమస్యలు చెబుతుంటారు. దీని కన్నా బంతి భోజనం మేలు అని అది ఎంతో బాగుండేది అని చెబుతారు.
మనవాళ్ళు బఫె భోజనం విధానాన్ని కొంచెం మార్చడం వలన ఇబ్బందులు వస్తున్నాయి. బఫె భోజనంలో ఎవరికీ వాళ్ళు వడ్డించుకోవాలి లేదంటే సహాయం చేయటానికి సిద్ధంగా ఉండాలి. పదార్థాలన్నిటిని ఒకే దగ్గర కాకుండా రెండు మూడు కౌంటర్లలో అందుబాటులో ఉంచాలి. అతిధులకు అనుగుణంగా స్థలం ఉండే విధంగా చూసుకోవాలి. ఆ ప్రదేశంలో కొని టేబుల్స్ కుర్చీలు వేసి ఉంచాలి. వడ్డించే వాళ్లకు లేదా సహాయం ఉండేవాళ్లకు క్లియర్ గా నియమాలు చెప్పి ఉండాలి.
బఫె విధానంలో మనకు నచ్చిన పదార్థాలను తీసుకునే అవకాశం ఉంటుంది. నచ్చితే ఒకటికి రెండు ఎక్కువ తీసుకోవొచ్చు. అనవసరమైన వృధా తగ్గుతుంది. ఇంత టైం లోనే తినాలి అనే పరిస్థితి ఉండదు. వడ్డించే వారి కోసం ఆగవలసిన అవసరం ఉండదు. తక్కువ సిబ్బందితో ఎక్కువ మందికి సర్వీస్ చేయవచ్చు.
సమస్యలు రావటానికి కారణం వేడుక చేసే వాళ్ళు ఒకే సారి భోజనాలకు అందర్నీ పిలవడం వలన సమస్య ఎక్కువగా రావడం జరుగుతుంది. అలా కాకుండా భోజనాలను ఎక్కువ సమయం అందుబాటులో ఉంచడం వలన తోపులాట క్యూలో నిలబడడం అనేవి ఉండవు. పదార్థాలను రెండు మూడు కౌంటర్లు లో ఏర్పాటు చేయడం వలన సమస్య తగ్గుతుంది. అలాగే అన్ని ఆహార పదార్థాలు పేర్లను సూచించే బోర్డ్స్ పెట్టడం వలన అతిధులు ఎం కావాలో చూసి తీసుకుంటారు. అలాగే వడ్డించే దగ్గర ముఖ్యమైన వాళ్ళు ఒకరిద్దరు పర్యవేక్షించక పోవడం వలన కూడా ఇబ్బంది కలుగుతుంది. కొన్ని జాగ్రత్తలు తీసుకొని సరి అయిన విధంగా చేస్తే బఫె అనేది భోజనాలకు మంచి విధానం.
