దక్షిణ ఇంగ్లాండ్లో తీవ్ర నీటి ఎద్దడి నెలకొంది. గత కొద్ది రోజులుగా కురుస్తున్న తుపాను, గడ్డకట్టే చలి కారణంగా కెంట్, ససెక్స్ కౌంటీల్లోని సుమారు 30,000 ఇళ్లకు నీటి సరఫరా పూర్తిగా నిలిచిపోయింది. దీంతో స్థానిక యంత్రాంగం ‘మేజర్ ఇన్సిడెంట్’ (అత్యవసర పరిస్థితి) ప్రకటించింది.
జనవరి 13, 2026
గోరెట్టి తుపాను ధాటికి కెంట్, ససెక్స్ ప్రాంతాలు అస్తవ్యస్తమయ్యాయి. విద్యుత్ సరఫరా దెబ్బతినడం, గొట్టాలు పగిలిపోవడంతో వేలాది కుటుంబాలు చుక్క నీరు లేక ఇబ్బందులు పడుతున్నాయి. ముఖ్యంగా టన్బ్రిడ్జ్ వెల్స్, మేడ్స్టోన్, కాంటర్బరీ వంటి పట్టణాల్లో పరిస్థితి దారుణంగా ఉంది. చాలా ఇళ్లలో అసలు నీరు రావడం లేదు, మరికొన్ని చోట్ల నీటి ఒత్తిడి (ప్రెజర్) చాలా తక్కువగా ఉంది.
సౌత్ ఈస్ట్ వాటర్ (SEW) సంస్థ ఈ విపత్తుకు మూడు ప్రధాన కారణాలను పేర్కొంది. మొదటిది గోరెట్టి తుపాను వల్ల నీటిని శుద్ధి చేసే ప్లాంట్లు సరిగా పనిచేయకపోవడం. రెండోది పంపింగ్ స్టేషన్లకు కరెంటు సరఫరా ఆగిపోవడం. ఇక మూడోది ఒక్కసారిగా చలి పెరగడం వల్ల భూమిలో ఉన్న పైపులు గడ్డకట్టి పగిలిపోవడం.
“ప్రస్తుతం మా బృందాలు రేయింబవళ్లు పనిచేస్తున్నాయి. పరిస్థితిని చక్కదిద్దేందుకు వాటర్ ట్యాంకర్ల ద్వారా పైపుల్లోకి నీటిని ఎక్కిస్తున్నాం” అని సంస్థ ప్రతినిధి ఒకరు తెలిపారు.
మూతపడిన పాఠశాలలు, ఆసుపత్రుల్లో ఇబ్బందులు
నీరు లేకపోవడంతో జనజీవనం స్తంభించిపోయింది. పారిశుద్ధ్య సమస్యలు తలెత్తుతాయనే భయంతో కెంట్, ససెక్స్ పరిధిలోని పలు పాఠశాలలు, గ్రంథాలయాలను మూసివేశారు. ఈస్ట్ గ్రిన్స్టెడ్లోని క్వీన్ విక్టోరియా ఆసుపత్రిలో కూడా నీటి కొరత ఉంది. దీంతో అత్యవసరం కాని అపాయింట్మెంట్లను ఫోన్ కాల్స్ ద్వారా (వర్చువల్) నిర్వహిస్తున్నారు. అలాగే హోటళ్లు, రెస్టారెంట్లు కనీస శుభ్రత పాటించలేకపోతే వెంటనే వ్యాపారాలు ఆపేయాలని అధికారులు ఆదేశించారు.
మంచి నీటి కేంద్రాలు
ప్రజల దాహం తీర్చేందుకు కొన్ని చోట్ల బాటిల్ వాటర్ కేంద్రాలను ఏర్పాటు చేశారు. ఇవి రాత్రి 10 గంటల వరకు అందుబాటులో ఉంటాయి:
ఈస్ట్ గ్రిన్స్టెడ్: కింగ్స్ సెంటర్ (RH19 3LN), స్పోర్ట్స్ క్లబ్ (RH19 4JU), ఈస్ట్ కోర్ట్ (RH19 3LT).
టన్బ్రిడ్జ్ వెల్స్: సెయింట్ మార్క్స్ రిక్రియేషన్ గ్రౌండ్ (TN2 5LS).
హెడ్కార్న్: హెడ్కార్న్ ఏరోడ్రోమ్ (TN27 9HX).
మంగళవారం సాయంత్రానికి సరఫరా కొంత మెరుగయ్యే అవకాశం ఉన్నా, పూర్తిస్థాయిలో నీరు రావడానికి బుధవారం వరకు పట్టవచ్చని తెలుస్తోంది.
