ఆడవాళ్ళకు ఆడవాళ్లు శత్రువులు అనే కన్నా వాళ్ళను ఆ విధంగా ఏళ్లుగా బ్రెయిన్ వాష్ చేసి వాళ్ళను ఆవిధంగా తయారు చేశారు. మనుషులందరికి ఒకే విధమైన తెలివితేటలూ, ఐక్యూ, లాజికల్ థింకింగ్ ఉండవు. తెలివైన ఆడవాళ్లు బయటికి వచ్చి మాట్లాడి ప్రశ్నించి పోరాడితే ఎన్నో ఏళ్ళ తరువాత ఓటు హక్కు రాజ్యాధికారం ఉద్యోగాలు చేయగలుగుతున్నారు. కొంతమంది తెలివైన ఆడవాళ్లు హాఫ్ బ్రెయిన్ తో ఆడవాళ్లకు శత్రువులుగా మారి ఆడవాళ్లను తిట్టడం దూషించడం వాళ్ళు ఎలా ఉండాలో చెప్పి ఆడవాళ్లను చీకట్లో ఉంచే ప్రయత్నం చేస్తున్నారు.
పుట్టినప్పటి నుండి వివక్షను తిట్లను దూషణలను భరించడం ఏంటో ఎప్పుడైనా మగవాళ్ళు అనుభవించారా? తల్లితండ్రులు అన్నలు తమ్ములు స్కూల్లో టీచర్లు సమాజం ఇలా అందరు నీవు అమ్మాయివే కదా నీవు అమ్మాయివే కదా అంటూ మాట్లాడుతూ వాళ్ళను తక్కువ చేయడం ఎలా ఉంటుందో ఎప్పుడైనా ఫీల్ అయ్యారా? నీకు చదువెందుకు? నీకు ఉద్యోగం ఎందుకు? నీకు ఆస్తి ఎందుకు? నీకు ఇంత ఖరీదయినా బట్టలు ఎందుకు? నీకు ఇలాంటి బట్టలు ఎందుకు? ఎప్పుడు నీవు బయటికి ఎందుకు? ఇవే కదా వాళ్లకు ఇచ్చే బహుమానాలు.
భర్తకు ఇష్టమైన వంటలు చేసి పెట్టాలి, భర్తను సుఖ పెట్టాలి, భర్త చెప్పినట్లు వినాలి, అత్తమామలకు సేవ చేయాలి, ఉద్యోగం చేయకుండా ఇంట్లోనే ఉండాలి ఇవే కదా సంవత్సరాలుగా నూరిపోసి వాళ్ళను ఆ విధంగా తయారు చేసింది. ఇప్పుడిప్పుడే కదా కొంతమంది అమ్మాయిలు చదువుకొని పెళ్లి విషయంలో భర్త విషయంలో బట్టల విషయంలో తమ ఇష్టాన్ని కొంచెం దైర్యంగా చెబితే భరించలేక భూతులు రాస్తూ తిడుతూ తమలోని కుళ్ళును వెళ్లగక్కుతున్నది.
ఎప్పుడైనా వంటగదిలో గంటలు గంటలు నిలబడి పని చేస్తే ఎలా ఉంటుందో తెలుసా? ఇష్టమున్నా లేకపోయినా భర్తతో బలవంతంగా కలవడం ఎంత కష్టంగా ఉంటుందో తెలుసా? ప్రతి రూపాయికి భర్తను లేదా ఇంట్లో వాళ్ళను అడగటానికి మనసును చంపుకోవడం ఏంటో తెలుసా? ఎక్కడికైనా వెళ్ళాలి అంటే ఇంట్లో పర్మిషన్స్ తీసుకోవడం ఎంత ఇబ్బందిగా ఉంటుందో తెలుసా? ఎలా తెలుస్తాయి ఎప్పుడైనా వాళ్ళు కూడా మనుషులే అని మనకు గుర్తుకు వస్తే కదా తెలియటానికి.
మన సంస్కృతి, మన పరువు ప్రతిష్టలు అనేవి ఆడవాళ్ళలో లేవు అని ఎప్పటికి అర్థం చేసుకుంటాం. వాళ్ళు మనతో సమానం అని కాదు వాళ్ళు మనకన్నా చాలా చాలా ఎక్కువ అని ఎప్పటికి అర్థం అవుతుంది. వాళ్ళు లేకపోతె మొత్తం మనిషి మనుగడే లేదు అని ఎప్పటికి తెలుస్తుంది. మగవాళ్ళు ఎలా జీవిస్తున్నారో మహిళలు కూడా అలాగే జీవించాలి అనుకుంటారు అని ఎప్పటికి అర్థం అవుతుంది.
వాళ్ళు వస్త్రధారణలో వాళ్ళ అలవాట్లలో సంస్కృతిని వెదకకండి వాళ్ళ పెళ్లిలో మీ పరువు ప్రతిష్టలను ముడిపెట్టకండి. వాళ్ళు ఎం వేసుకున్నా వాళ్ళు ఎం తాగుతున్నా వాళ్ళు ఎం తింటున్నా వాళ్ళ మనన వాళ్ళను వదిలెయ్యడం నేర్చుకోండి నేర్పించండి అర్థం చేసుకోండి. వాళ్ళు చదువుకున్నా ఉద్యోగం చేస్తున్నా పదవి పొందినా తిరిగి మా చెప్పుచేతల్లో ఉండాలి చెప్పినట్లు వినాలి అనే ఆలోచనను వదిలెయ్యండి వాళ్ళు మనకన్నా చాల చాలా విషయాల్లో మెరుగైన వాళ్ళు అని ఆలోచన చెయ్యండి అర్థం చేసుకోండి.
