మనుషులు సమూహ జీవులు. సమూహం ఏం చేస్తుందో అదే మనుషులు చేయటానికి ప్రయత్నిస్తారు. మెజారిటీ మనుషులకు తెలివితేటలు, ఐక్యూ అనేవి యావరేజ్ గా ఉంటాయి. మిగతావాళ్ళకు తెలివితేటలు, ఐక్యూ ఎక్కువగా ఉంటుంది. సమాజ గమనాన్ని వాళ్ళే నిర్దేశిస్తారు.
అందరు మనుషులను తమకిష్టమొచ్చినట్లు జీవించమని చెబుతారు ఇలా చెప్పడం చాల సులభం. కాని మనుషులు తమకిష్టమొచ్చినట్లు జీవించాలి అంటే దానికి చాల ఆలోచన, విశ్లేషణ, నిర్ణయాత్మకశక్తి, ధైర్యం కావాలి. మెజారిటీ మనుషులు ఇవన్నీ చేయలేరు. వాళ్ళు అనుసరించడం సులభం అని అనుసరిస్తారు.
ఒకవేళ ఒక వ్యక్తికి ఆలోచన, విశ్లేషణ, నిర్ణయాత్మకశక్తి, ధైర్యం ఇవన్నీ ఉండి జీవించాలి అనుకున్నా, అతనికి అతని భార్యపిల్లలు, అతని తల్లితండ్రులు సహకరించాలి. వాళ్లందరికీ ఆలోచన, విశ్లేషణ, నిర్ణయాత్మకశక్తి, ధైర్యం ఇవన్నీ ఉండాలి, అతనికి సపోర్ట్ గా నిలబడాలి. ఇవన్నీ అతికొద్దిమందికి మాత్రమే సాధ్యం.
మనిషి మీద ఎందుకు ఒత్తిడి ఉంటుంది అంటే అది సమూహప్రభావం. ఒకప్పుడు ఒత్తిడి తక్కువగా ఉండేది ఎందుకంటే కమ్యూనికేషన్ తక్కువగా ఉండేది. ప్రపంచంలో జరిగే విషయాలు తెలియటానికి చాల సమయం పట్టేది, మనుషులు మాట్లాడుకునేది చాల తక్కువగా ఉండేది.
ఎప్పుడైతే కమ్యూనికేషన్ టెక్నలాజి పెరిగిందో మనుషుల మీద ఒత్తిడి కూడా పెరిగింది. ఇప్పుడు ఎదుటి వాళ్ళు ఏం చేసేది గంటల్లోనే తెలిసిపోతుంది. మేము ఇల్లుకట్టాం, మేము కారు కొన్నాము, మేము టూర్ వెళ్లాం, మేము పెళ్లి ఇంత గ్రాండ్ గా చేసాం, మేము ఫైవ్ స్టార్ హోటల్ లో భోజనం చేశాం అని వాట్సాప్ స్టేటస్ లలో పెట్టేస్తున్నారు.
మరి ఇవన్ని చూసిన మిగతావాళ్ళు మేము ఎప్పుడు ఇల్లు కొనాలి, కారు కొనాలి, టూర్ వెళ్ళాలి అనే ఆలోచన చేస్తారు దానితో ఒత్తిడి పెరుగుతుంది. అవన్నీ మనకు అనవసరం, మనకు ఉన్నదాంట్లో మనం జీవిద్దాం అనుకుంటే ఇంట్లో కుటుంబసభ్యులు కావొచ్చు, బంధువులు, స్నేహితులు, ఇరుగుపొరుగు అందరు చిన్నచూపు చూస్తారు, చేతకానివాడిగా చూస్తారు.
మరి దీనినుండి బయటపడడం ఎలా? బయటపడడం కష్టం, కాకపోతే కొన్ని ప్రయత్నాలు చేయవచ్చు. ఒకటి తల్లితండ్రులను ఎన్నుకోలేం కాబట్టి వాళ్ళ విషయంలో ఏం చేయలేము. పెళ్లి చేసుకునేముందు అమ్మాయితో లేదా అబ్బాయితో మాట్లాడి వాళ్ళఆలోచన ఏంటి, ఎలాంటి జీవితం వాళ్ళు కోరుకుంటున్నారు అనే విషయాలు ఒకరితో ఒకరు షేర్ చేసుకొని కుదిరితే పెళ్లి చేసుకోవడం వలన ఒత్తిడిలేని జీవితం జీవించటానికి అవకాశం ఉంటుంది, అది కూడా 100% ఉంటుంది అనుకోలేము.
అలాగే పిల్లల పెంపకంమీద ఎక్కువ శ్రద్దపెట్టి, ఆర్థిక పరిస్థితులు, సమాజ పరిస్థితులు, కుటుంబ పరిస్థితులు వాళ్లతో పంచుకుంటే వాళ్ళను సరి అయిన మార్గంలో నడిపించే ప్రయత్నం చేయవచ్చు. ఇలా చేసినా పిల్లలు మన ఆలోచనలకు అనుగుణంగా ప్రవర్తిస్తారు అనే గ్యారంటీ లేదు. ఎందుకంటే ఎదిగేకొద్దీ వాళ్ళకుండే లక్షణాలు బయటపడతాయి. అప్పుడు అవి తల్లిదండ్రులతో సరిపోకపోవొచ్చు. మనిషి ప్రయత్నం అయితే చేయాలి ఎందుకంటే ప్రయత్నం చేయకుంటే మార్పు ఎలా వస్తుంది!?
