ఆస్ట్రేలియాలోని అడిలైడ్లో భారత సంతతికి చెందిన గౌరవ్ కుండి (Gaurav Kundi) అనే యువకుడిపై అక్కడి పోలీసులు ఇటీవల కర్కశంగా వ్యవహరించిన విషయం తెలిసిందే. ఈ క్రమంలో తీవ్ర గాయాలపాలైన గౌరవ్.. చికిత్స పొందుతూ మృతి చెందినట్లు స్థానిక మీడియా వెల్లడించింది. అడిలైడ్లో ఉండే గౌరవ్ కుండి, అమృత్పాల్ కౌర్ దంపతుల మధ్య ఇటీవల చిన్న వాగ్వాదం చోటుచేసుకుంది. అది గమనించిన పెట్రోలింగ్ పోలీసులు.. గృహ హింసగా భావించారు. అనంతరం ఇంట్లోకి వచ్చి గౌరవ్ను అదుపులోకి తీసుకొనేందుకు ప్రయత్నించారు. అయితే, తమ మధ్య ఎలాంటి గొడవ లేదని, కేవలం చిన్న వాగ్వాదమేనని అతడి భార్య అమృత్పాల్ వారించినప్పటికీ పోలీసులు వినిపించుకోలేదు. తాను ఎలాంటి నేరం చేయలేదని గౌరవ్ ఎంత వేడుకున్నా కనికరించలేదు. అతడిని బలవంతంగా నేలపై పడేసి అరెస్టు చేసేందుకు యత్నించారు. ఈ ఘటనను అమృతాల్ తన కెమెరాలో చిత్రీకరించడంతో పోలీసుల కర్కశత్వం బయటపడింది.
అయితే, కిందపడిన తన భర్త మెడను ఓ పోలీసు అధికారి మోకాలితో గట్టిగా అదిమి పట్టాడని, అరెస్టు సమయంలో తల నేలకు, పోలీసు వాహనానికి బలంగా తాకడంతో గౌరవ్ అక్కడే స్పృహ కోల్పోయాడని అమృత్పాల్ ఆరోపించారు. ఆస్పత్రికి తరలించగా.. పరీక్షించిన వైద్యులు అతడి మెదడు, మెడ నరాలు తీవ్రంగా దెబ్బతిన్నట్లు గుర్తించారు. దీనిపై పూర్తిస్థాయి దర్యాప్తు జరిపి తమకు న్యాయం చేయాలని అమృత్పాల్ వేడుకున్నారు. ఈ చర్య 2020లో అమెరికాలో జరిగిన ఆఫ్రో- అమెరికన్ జార్జి ఫ్లాయిడ్ ఉదంతాన్ని తలపించిందని స్థానిక మీడియా పేర్కొంది.
ఏమిటీ జార్జ్ ఫ్లాయిడ్ ఉదంతం?
2020 సంవత్సరంలో ఓ పోలీస్ అధికారి కర్కశత్వానికి జార్జ్ ఫ్లాయిడ్ అనే ఆఫ్రికన్ అమెరికన్ జార్జ్ ఫ్లాయిడ్ (46) మృతి చెందాడు. పోలీసు అతడి మెడపై మోకాలితో నొక్కడం వల్ల మెడపై ఒత్తిడి కలిగి మెదడుకు రక్తప్రసరణ ఆగిపోయిందని.. దీంతో గుండె ఆగి జార్జ్ మరణించినట్లు వైద్యులు స్పష్టంచేశారు. ఈ ఘటన అమెరికాతో సహా ప్రపంచదేశాలలో పెద్దఎత్తున నిరసనలకు దారితీసింది. నల్లజాతీయులపై హింస.. జాతి వివక్ష వంటి సమస్యలపై అమెరికాలో వేలాదిమంది ప్రజలు రోడ్ల పైకి వచ్చి నిరసనలు తెలిపారు. దీంతో అప్పటి అమెరికా అధ్యక్షుడు ట్రంప్ బంకర్లో దాక్కోవాల్సిన పరిస్థితి ఏర్పడింది.
