తెలంగాణ మాజీ ముఖ్యమంత్రి కె. చంద్రశేఖర్ రావు (కెసిఆర్), మాజీ మంత్రి హరీష్ రావు, బీజేపీ నేత ఈటల రాజేందర్‌లకు కాళేశ్వరం ప్రాజెక్ట్ విచారణ కమిషన్ నోటీసులు జారీ చేసింది. జస్టిస్ పినాకి చంద్ర ఘోష్ నేతృత్వంలోని ఈ కమిషన్, కాళేశ్వరం ప్రాజెక్టులోని మేడిగడ్డ, అన్నారం, సుందిళ్ల బ్యారేజీల నిర్మాణంలో లోపాలు, అవినీతి ఆరోపణలపై విచారణ జరుపుతోంది. కెసిఆర్ జూన్ 5, హరీష్ రావు జూన్ 6, ఈటల రాజేందర్ జూన్ 9న విచారణకు హాజరు కావాలని నోటీసుల్లో పేర్కొన్నారు. 15 రోజుల్లో విచారణకు హాజరు కావాలని కమిషన్ ఆదేశించింది.
కమిషన్ గత ఏడాది ఫిబ్రవరిలో ఏర్పాటై, నీటిపారుదల శాఖ అధికారులు, ఇంజనీర్లు, కాంట్రాక్టర్ల నుంచి అఫిడవిట్లు సేకరించి, కాగ్, నేషనల్ డ్యామ్ సేఫ్టీ అథారిటీ నివేదికలను పరిశీలించింది. కెసిఆర్ నిర్ణయాలే బ్యారేజీల వైఫల్యానికి కారణమని అధికారులు వాంగ్మూలం ఇవ్వడంతో, కమిషన్ వీరిని విచారణకు పిలిచింది. దాదాపు 1,000 పేజీల నివేదిక సిద్ధమైనట్లు సమాచారం, ఈ నెల మూడో వారంలో ప్రభుత్వానికి సమర్పించనున్నారు.
