RJD అధ్యక్షుడు లాలూ ప్రసాద్ యాదవ్ తన పెద్ద కుమారుడు తేజప్రతాప్ యాదవ్‌ను ఆరు సంవత్సరాలకు పార్టీ నుండి తొలగించారు. శనివారం తేజప్రతాప్ ఒక యువతితో సంబంధంలో ఉన్నట్టు సోషల్ మీడియాలో ప్రకటించిన మరుసటి రోజే ఈ నిర్ణయం వెలువడింది.
లాలూ ప్రసాద్ యాదవ్ “X” ద్వారా ప్రకటించారు:
“ఇప్పటినుంచి తేజప్రతాప్‌కు పార్టీలో, కుటుంబంలో ఎలాంటి పాత్ర ఉండదు. వ్యక్తిగత జీవితంలో నైతిక విలువలను పట్టించుకోకపోవడం మన సామూహిక సామాజిక న్యాయ పోరాటాన్ని బలహీనపరిచే పని. నా పెద్ద కుమారుడి ప్రవర్తన, అతని ప్రజా ప్రదర్శనలు, బాధ్యతారాహిత్యంతో కూడిన ప్రవర్తన మా కుటుంబ విలువలకు అనుకూలంగా లేవు. అందుకే అతన్ని పార్టీ నుండి కుటుంబం నుండి దూరంగా ఉంచుతున్నాను. అతనితో సంబంధం కొనసాగించదలచినవారు స్వేచ్ఛగా కొనసాగవచ్చు. నేను ఎప్పుడూ ప్రజా మర్యాదకు మద్దతుగా ఉన్నాను, మా కుటుంబ సభ్యులు కూడా అదే విధంగా ప్రవర్తించారు.”
శనివారం తేజప్రతాప్ తన ఫేస్‌బుక్‌లో ఒక యువతితో కలిసి ఉన్న ఫోటోను షేర్ చేస్తూ ఇలా క్యాప్షన్ ఇచ్చారు:
“ఈమె అనుష్కా యాదవ్. మేము గత 12 సంవత్సరాలుగా ఒకరినొకరం గుర్తు చేసుకుంటూ ప్రేమలో ఉన్నాము.”
అయితే ఆ రాత్రే ఆ పోస్ట్ తొలగించబడింది. అనంతరం తేజప్రతాప్ తన ఫేస్‌బుక్ ఖాతా హ్యాక్ అయ్యిందని, తనను, తన కుటుంబాన్ని బద్నాం చేయాలన్న కుట్ర జరుగుతోందని చెప్పారు.
తేజప్రతాప్, వయసు 37, ఇప్పటికే వివాహితుడు. 2018లో బీహార్ మాజీ ముఖ్యమంత్రి దరోగాప్రసాద్ రాయ్ మనుమరాలు ఐశ్వర్య రాయ్‌ను పెళ్లి చేసుకున్నాడు. కానీ కొద్దికాలంలోనే ఐశ్వర్య అతని ఇంటిని విడిచి వెళ్లిపోయి, తనను తన కుటుంబాన్ని వేధించారని ఆరోపించారు. ప్రస్తుతం వారి మధ్య విడాకుల కోర్టు కేసు సాగుతోంది.
