అమెరికాలోని ప్రఖ్యాత హార్వర్డ్ యూనివర్సిటీకి డొనాల్డ్ ట్రంప్ ప్రభుత్వం గట్టి షాక్ ఇచ్చింది. ఇకపై ఆ విశ్వవిద్యాలయానికి ఎలాంటి ఫెడరల్ గ్రాంట్లు అందవని అమెరికా విద్యాశాఖ కార్యదర్శి లిండా మెక్‌మాన్ సోమవారం స్పష్టం చేశారు. ఈ మేరకు హార్వర్డ్ అధ్యక్షుడికి రాసిన లేఖను ఆమె ఆన్‌లైన్‌లో పోస్ట్ చేశారు. క్యాంపస్‌లో యూదు వ్యతిరేకతను సహిస్తోందనే ఆరోపణలతో పాటు, ప్రభుత్వ డిమాండ్లను పాటించడం లేదనే కారణాలతో ట్రంప్ సర్కార్ ఈ కఠిన నిర్ణయం తీసుకుంది.
గత కొంతకాలంగా హార్వర్డ్‌తో పాటు పలు ఇతర ఉన్నత విద్యాసంస్థలపై ట్రంప్ ప్రభుత్వం ఒత్తిడి పెంచుతోంది. క్యాంపస్‌లలో యూదు వ్యతిరేకతను అరికట్టడంలో విఫలమయ్యాయని ఆరోపిస్తూ, వాటి బడ్జెట్లు, పన్ను మినహాయింపులు, విదేశీ విద్యార్థుల ప్రవేశాలపై ఆంక్షలు విధిస్తామని హెచ్చరిస్తోంది. ఈ క్రమంలోనే, హార్వర్డ్ తన చట్టపరమైన, నైతిక బాధ్యతలను నెరవేర్చడంలో విఫలమైందని, పారదర్శకత లోపించిందని, విద్యా ప్రమాణాలను పాటించడం లేదని విద్యా కార్యదర్శి మెక్‌మాన్ తన లేఖలో ఆరోపించారు.
అడ్మిషన్లు, నియామకాలు, రాజకీయ వైఖరి వంటి విషయాల్లో ప్రభుత్వ పర్యవేక్షణను అంగీకరించడానికి హార్వర్డ్ నిరాకరించడంతో, ఏప్రిల్ మధ్యలోనే ట్రంప్ ప్రభుత్వం ఆ వర్సిటీకి అందాల్సిన 2.2 బిలియన్ డాలర్ల ఫెడరల్ నిధులను స్తంభింపజేసింది. మొత్తం 9 బిలియన్ డాలర్ల నిధులపై సమీక్ష జరుగుతోందని అప్పట్లో తెలిపింది. తాజా లేఖతో భవిష్యత్తులో హార్వర్డ్‌కు ఎలాంటి కొత్త గ్రాంట్లు అందవని మెక్‌మాన్ తేల్చి చెప్పారు.
యూదు వ్యతిరేకతను అరికట్టడం, మైనారిటీల చారిత్రక అణచివేతను పరిష్కరించే లక్ష్యంతో ఉన్న డైవర్సిటీ ప్రోగ్రామ్‌లను తిప్పికొట్టాలనే కారణాలతో ట్రంప్ ప్రభుత్వం అమెరికా విశ్వవిద్యాలయాలపై పలు రకాలుగా చర్యలు తీసుకుంటోంది. ఈ చర్యలు విద్యా స్వేచ్ఛపై ఆందోళనలను రేకెత్తిస్తున్నాయి.
