ఒకవైపు అక్రమ వలసలను నిరోధిస్తానని చెబుతూ, ఇప్పటికే నిబంధనలకు వ్యతిరేకంగా గడువు ముగిసిన వలసదారులను కఠినంగా డిపోర్ట్ చేయిస్తున్న అమెరికా అధ్యక్షుడు డోనాల్డ్ ట్రంప్. మరోవైపు అమెరికా పౌరసత్వాన్ని కోరుకుంటున్న ప్రపంచవ్యాప్తంగా సంపన్నులను ఆకర్షించేందుకు ఇటీవల ‘గోల్డ్ కార్డ్’ ను ప్రకటించారు. ఆ కార్డ్‌కు సంబంధించిన ఫస్ట్ లుక్‌ను ఆయన విడుదల చేశారు. ఆ గోల్డ్ కార్డ్ మీద ట్రంప్ ఫోటోనే ఉంది. దాన్ని ఆయన 5 మిలియన్ డాలర్లతో కొనుగోలు చేశారని చెప్పారు. ఎయిర్ ఫోర్స్ వన్‌లో విలేకరులతో మాట్లాడే సమయంలో ఆయన దీన్ని చూపించారు. దీన్ని తానే మొదటగా కొనుగోలు చేశానని అన్నారు. EB-5 వీసా (Investor’s Visa) విధానాన్ని రద్దు చేసి, 43.5 కోట్ల రూపాయిలు (50 లక్షల డాలర్లు) వెచ్చించగలవారికి ఈ గోల్డ్ కార్డ్ అందిస్తామని ఇటీవల ట్రంప్ ప్రకటించారు. దీన్ని కొనుగోలు చేసినవారికి నేరుగా అమెరికా పౌరసత్వాన్ని అందజేస్తారు. ప్రపంచవ్యాప్తంగా ఉన్న సంపన్నులను ఆకర్షించేందుకే దీన్ని ప్రవేశపెట్టామని, వారు అమెరికాకు వచ్చి భారీగా ఖర్చు పెడితే, స్థానికంగా ఉద్యోగాలు పెరుగుతాయని ట్రంప్ అన్నారు.
గోల్డ్ కార్డుకు భారీగా స్పందన వచ్చిందని, ఒక్కరోజే 1,000 కార్డులను అమ్మినట్లు వాణిజ్య శాఖ మంత్రి హోవర్డ్ లుట్నిక్ ఇటీవల తెలిపారు. వీటి ద్వారా 5 బిలియన్ డాలర్లు సేకరించామన్నారు. ప్రపంచవ్యాప్తంగా 3.7 కోట్ల మందికి ఈ కార్డు కొనే సామర్థ్యం ఉందని చెప్పారు. చట్టబద్ధ ఇన్వెస్టర్లకు పౌరసత్వం, శాశ్వత నివాసం కల్పించేందుకు ఇది ఉపయోగపడుతుందన్నారు. చూద్దాం ట్రంప్ ప్రవేశపెట్టిన గోల్డ్ కార్డ్‌కు ప్రపంచవ్యాప్తంగా ఎంత స్పందన వస్తుందో!
