యూకే రక్షణ దళాల అధిపతి ఎయిర్ చీఫ్ మార్షల్ సర్ రిచర్డ్ నైటన్ పార్లమెంటరీ కమిటీ సాక్షిగా సంచలన విషయాలు వెల్లడించారు. ఒకవేళ పూర్తి స్థాయి యుద్ధం సంభవిస్తే, దేశాన్ని రక్షించుకోవడానికి ప్రస్తుతం యూకే దగ్గర ఎలాంటి సమగ్ర ప్రణాళిక లేదని ఆయన స్పష్టం చేశారు. రక్షణ బడ్జెట్లో భారీ లోపాలు ఉన్నాయని, అనుకున్న లక్ష్యాలను చేరుకోవడం ప్రస్తుత నిధులతో సాధ్యం కాదని ఆయన హెచ్చరించారు.
యుద్ధానికి సిద్ధంగా లేని బ్రిటన్
కోల్డ్ వార్ ముగిసిన తర్వాత “గవర్నమెంట్ వార్ బుక్” అనే జాతీయ స్థాయి రక్షణ ప్రణాళికను యూకే పక్కన పెట్టింది. సైన్యం నుంచి మొదలుకొని ఎన్.హెచ్.ఎస్ (NHS) వరకు అన్ని విభాగాలు యుద్ధ సమయంలో ఎలా స్పందించాలో చెప్పే ఈ ప్రణాళిక ఇప్పుడు అమలులో లేదు. ముఖ్యంగా యూరప్లో పెద్ద ఎత్తున యుద్ధం జరిగితే, గాయపడిన పౌరులను లేదా సైనికులను కాపాడటానికి వైద్య సిబ్బందిని ఎలా సమీకరించాలో కూడా ప్రస్తుతానికి ఎలాంటి స్పష్టత లేదని సర్ రిచర్డ్ అంగీకరించారు.
బడ్జెట్లో 28 బిలియన్ పౌండ్ల లోటు
బ్రిటన్ రక్షణ శాఖ (MoD) ముందున్న అతిపెద్ద సవాలు నిధుల కొరత. వచ్చే నాలుగేళ్లలో రక్షణ అవసరాలకు దాదాపు 28 బిలియన్ పౌండ్ల లోటు ఏర్పడే అవకాశం ఉందని నివేదికలు చెబుతున్నాయి. ప్రభుత్వం కొత్త రక్షణ పరికరాలను కొనాలని భావిస్తున్నా, అందుకు తగ్గ నిధులు లేకపోవడంతో కొన్ని కీలక నిర్ణయాలను వదులుకోవాల్సి వస్తోందని ఆయన తెలిపారు. ప్రధాని కీర్ స్టార్మర్ కూడా ఈ బడ్జెట్ లోటుపై అసంతృప్తిగా ఉన్నట్లు తెలుస్తోంది.
సమాజం మొత్తం సిద్ధం కావాలి
మాజీ సైన్యాధిపతి జనరల్ సర్ పాట్రిక్ సాండర్స్ హెచ్చరించినట్లుగానే, రష్యా నుంచి పొంచి ఉన్న ముప్పును తక్కువగా అంచనా వేయలేమని సైనిక నిపుణులు భావిస్తున్నారు. కేవలం సైన్యం మాత్రమే కాకుండా, పౌర సంస్థలు, పరిశ్రమలు మరియు సామాన్యులు కూడా దేశ రక్షణలో భాగం కావాలని సర్ రిచర్డ్ పిలుపునిచ్చారు. ప్రస్తుతం క్యాబినెట్ కార్యాలయం ఆధ్వర్యంలో కొత్త జాతీయ రక్షణ ప్రణాళికను రూపొందిస్తున్నారు. ఇది ఈ ఏడాది చివరలో అందుబాటులోకి వచ్చే అవకాశం ఉంది.