ప్రతి సంవత్సరం మార్చి 8న ప్రపంచవ్యాప్తంగా అంతర్జాతీయ మహిళా దినోత్సవం (International Women’s Day) జరుపుకుంటారు. ఈ దినోత్సవాన్ని మహిళల హక్కులు, సాధించిన విజయాలు, సమానత్వం, లింగ భేదాన్ని తగ్గించేందుకు తీసుకోవాల్సిన చర్యలను గుర్తుచేసేందుకు జరుపుతారు.
1908లో న్యూయార్క్లో 15,000 మంది మహిళలు స్వల్ప పని గంటలు, మెరుగైన వేతనం, ఓటు హక్కు కోసం ర్యాలీ నిర్వహించారు. అంతర్జాతీయ మహిళా దినోత్సవాన్ని తొలిసారిగా 1911లో ఆస్ట్రియా, డెన్మార్క్, జర్మనీ, స్విట్జర్లాండ్ దేశాల్లో నిర్వహించారు. 2011లో అంతర్జాతీయ మహిళా దినోత్సవ శతాబ్ది వేడుకలు కూడా
జరిగాయి.
1917 యుద్ధ సమయంలో రష్యా మహిళలు ”ఆహారం – శాంతి” కోసం డిమాండ్ చేస్తూ సమ్మెకు దిగారు. నాలుగు రోజుల తర్వాత అప్పటి రష్యా సామ్రాట్ నికోలస్ జా 2 సింహాసనాన్ని వదులుకోవాల్సి వచ్చింది. అప్పుడు తాత్కాలికంగా ఏర్పాటైన ప్రభుత్వం మహిళలకు ఓటు వేసే హక్కును మంజూరు చేసింది. మహిళలు ఈ సమ్మెకు దిగిన రోజు జూలియన్ క్యాలెండర్ ప్రకారం (అప్పట్లో రష్యాలో ఈ క్యాలెండర్నే అనుసరించేవాళ్లు) ఫిబ్రవరి 23 ఆదివారం. గ్రెగోరియన్ క్యాలెండర్ ప్రకారం చూస్తే అది మార్చి 8వ తేదీ. అందుకే మార్చి 8వ తేదీన (ప్రపంచవ్యాప్తంగా అత్యధిక దేశాల్లో ఇప్పుడు అమలులో ఉన్నది గ్రెగోరియన్ క్యాలెండర్) అంతర్జాతీయ మహిళా దినోత్సవం జరుపుకుంటున్నారు.
మహిళల హక్కుల కోసం పోరాడిన ఉద్యమాలను గుర్తించడం, సమానత్వం, లింగ వివక్ష నివారణపై అవగాహన కల్పించడం, మహిళా సాధికారతను ప్రోత్సహించడం, సామాజిక, ఆర్థిక, రాజకీయ, సాంకేతిక రంగాల్లో మహిళల భాగస్వామ్యాన్ని పెంచడం అనేవి మహిళా దినోత్సవం ఉద్దేశాలు అనుకోవచ్చు.
అంతర్జాతీయ మహిళా దినోత్సవం రష్యా సహా చాలా దేశాల్లో జాతీయ సెలవు దినం. మార్చ్ ఎనిమిదికి ముందు, తర్వాత మూడు నాలుగు రోజుల పాటు రష్యాలో పువ్వుల కొనుగోళ్లు రెండింతలు అవుతుంటాయి. చైనాలో మార్చి 8వ తేదీన స్టేట్ కౌన్సిల్ సిఫార్సు మేరకు చాలా మంది మహిళలకు సగం రోజు పని నుంచి సెలవు లభిస్తుంది.
ఇటలీలో అంతర్జాతీయ మహిళా దినోత్సవం లేదా ‘ల ఫెస్టా డెల్ల డొన్న’ ను మిమోసా అనే చెట్టుకు పూసే పువ్వులను బహుకరించి జరుపుకుంటారు. అమెరికాలో అయితే మార్చి నెల మహిళల చరిత్ర నెల. అమెరికా మహిళల విజయాలను గౌరవిస్తూ ప్రతి ఏటా అధ్యక్ష ప్రకటన వెలువడుతుంది.
